Редовната физичка активност создава долготрајни здравствени придобивки. Без оглед на возраста, телесната тежина и физичките предиспозиции, секој човек може да ги искуси позитивните влијанија од извршувањето на физичките активности. Колку сме поактивни, толку повеќе придонесуваме во одржување на здравјето.

Со извршување физичка активност:

 

– го продолжуваме животниот век;
– подобро се чувствуваме;
– ги намалуваме шансите за појава на депресија;
– го подобруваме сонот;
– ја зголемуваме подвижноста;
– ги зацврстуваме мускулите и коските;
– одржуваме здрава телесна тежина;
– се дружиме со пријатели или запознаваме нови;
– уживаме и се забавуваме.

 

Доколку не сме редовно физички активни постои опасност од:

 

– појава на срцеви болести;
– дијабетес;
– висок крвен притисок;
– зголемен холестерол во крвта;
– зголемен ризик од инфаркт.

При извршување на некоја физичка активност имајте на ум дека здравствените придобивки се многу поголеми од можноста да се повредите.

Еве неколку совети што може да ви помогнат:

– ако не сте биле активни подолго време, почнете полека и постепено напредувајте со вежбите;
– разберете колкав интензитет на активности ви е препорачан;
– одберете ги оние активности што најмногу им одговараат на вашите физички предиспозиции;
– не преминувајте нагло на активностите што бараат поголем напор;
– користете соодветна опрема;
– одберете безбедно место за вршење на активноста;
– доколку имате здравствен проблем, консултирајте стручно лице.

Доколку не сте подготвени да облечете тренирки и да одвоите неколку часа неделно за напорни вежби, не очајувајте. Сè поголем број истражувачи се согласуваат дека спортските центри не се единствениот пат кон доброто здравје. Потребата од водење здрав живот може да се задоволи дури и со прошетка.
Се препорачува секојдневно, или барем 6 пати неделно да шетате по 30 минути, со разумно темпо од 5-6 км на час. На тој начин, се намалува ризикот од срцеви болести и болести на мозокот.
Пешачете сами или со друштво. Сè што ви е потребно е само добра волја. Колку повеќе пешачите – толку повеќе енергија ќе имате, а со самото тоа ќе се чувствувате подобро.
Пешачењето ги топи маснотиите во телото: во просек, човек троши 100 калории за изодени 1,5 км, а за тоа се потребни отприлика 2 000 чекори. Поголем број луѓе, откако ќе испешачат додатни 20 минути дневно, по една година губат околу 3 кг масни наслаги. Освен тоа, со пешачењето се ублажуваат болките во вратот и грбот.
Истражувањето спроведено на Универзитетот во Индијана, покажало дека само неколку кратки прошетки во текот на денот помагаат во намалувањето на крвниот притисок.
Пешачењето го забрзува метаболизмот, делува благотворно на поблагите случаи на депресија, помага во борбата со стресот, ја подобрува флексибилноста на зглобовите и мускулите, ги зајакнува коските и мускулите и не ги оптоварува колената како при трчањето или некои од другите активности.
За да ги забележите придобивките, потребно е редовно пешачење. Не очекувајте дека една 10-минутна прошетка во неделата ќе ви го намали крвниот притисок.
Започнете полека и со време зголемувајте ги минутажата и темпото на одење. Позитивните резултати ќе ги почувствувате многу брзо.

Физичката неактивност и стресот претставуваат еден ист проблем. А едно од најсовршените решенија на овој проблем е – јогата.
Таа нѐ учи без стрес да се соочиме со ситуациите што не се вредни за емоционално инвестирање. Всушност, таа нè учи како да ѝ се насмевнеме на определена ситуација, наместо да ја претвориме во непријатно доживување.
Јогата не ги отстранува само последиците од стресот, туку се занимава и со причините за нивната појава. Оваа индиска дисциплина, чие име значи единство, ги поврзува телото и духот. Јогата нема да ве премори, туку ќе ве научи како тренингот да го прилагодите на својата физичка кондиција и на моменталното расположение и подготвеноста за вежбање. Основното мото на јогата гласи: „Вежбајте во границите на пријатноста“.
Иако во текот на вежбите ве води инструктор, тој не е авторитет што ќе го диктира темпото, туку само светол пример на кој може да се огледате.
Јогата се одвива во серија од неколку умерени вежби, така што се активираат повеќе мускули одеднаш. Определени вежби поттикнуваат концентрација и фокус, додека пак некои инсистираат на опуштеност на свеста од вообичаеното размислување.
Воедно, инструкторот ве учи како да го изедначите дишењето со физичките вежби. Тренинзите се одвиваат во тишина, па на тој начин се учите како да ги слушате другите и како да се наслушнувате себеси. На крајот од тренингот следува медитација, по која се чувствувате обновени, подмладени и исполнети со елан.
Јогата ги ублажува и последиците од астмата, го регулира крвниот притисок, ја намалува опасноста од заболување на срцето, ја намалува главоболката и позитивно делува на метаболизмот. Јогата нè учи како да го прифатиме и засакаме своето тело, без обѕир на тоа што мислат другите за него. И најважно од сè – јогата не е само средство за брзо постигнување на убавина на телото, туку претставува животна филозофија на хармонијата.

Хунзите, жителите на Хималаите, се далеку познати по својата долговечност и по здравиот начин на живот. Тие живеат на чист воздух, ја пијат најчистата вода на светот и се хранат со многу комплексни јаглехидрати.
За разлика од нив, ние живееме во средина каде што воздухот е многу загаден, водата не е како онаа на Хималаите, а користиме храна со намалена нутритивна вредност. Јадеме премногу, а се движиме многу малку. Освен тоа, користиме и различни лекови за секаква намена. Сето тоа доведува до успорување на метаболизмот, губење на густината во коските, млитавење на мускулите и создавање основа за појава на други дополнителни болести.

Како да го успорите процесот на стареење?

Не смееме да заборавиме едно нешто – стареењето не е синоним за појава на болести.
Водењето здрав начин на живот може да нè увери во тоа.
За да се успори процесот на стареење, главен фактор е консумирањето големи количества вода. Свежата храна (овошје и зеленчук) нека ви биде секојдневие, бидејќи со неа телото се снабдува со витамини и минерали. Сировите јатки (бадеми, ореви, лешници), сировите семки (лен, сончоглед, сусам, тиква) и целозрнестите житарки се збогатени со диететски влакна (а ги има во интегралните лебови, а посебно во лебот со сончоглед и лебот со 6 семиња).
Почесто користете кромид, праз, лук (богати со сулфур) затоа што тие делуваат против процесот на стареење, а имаат и антиканцерогено дејство.
Наутро направете неколку лесни аеробни вежби, прошетајте во парк, искористете ја секоја можност да појдете на пливање или на хидромасажа.
За вечера користете интегрален леб кој во составот има пченица. Пченицата изобилува со фитоестрогени, едни од најзначајните хормони против стареењето.
И не заборавајте – долга младост обезбедува и добриот сон.

Науката уште многу одамна го докажа влијанието на храната врз работата на повеќето органи: бубрезите, цревата, црниот дроб, срцето, крвните садови, панкреасот, итн.
Но истражувањата покажаа дека храната влијае и на нашето расположение.
Невротрансмитерите (серотонин, допамин, епинефрин и норепинефрин) се одговорни за нашето добро или лошо расположение.
Па така, на пример, кога мозокот произведува серотонин, човекот се чувствува опуштено, задоволно и среќно. Од друга страна, доколку се лачи допамин, тогаш кај човекот се јавува чувство на непријатност, нервоза и анксиозност. Ниското ниво на серотонин честопати причинува појава дури и на депресија.
Комплексните јаглехидрати позитивно влијаат на нивото на сератонинот во организмот.
Житарките од цело зрно, од коишто се направени Супер лебовите, претставуваат главен извор на комплексни јаглехидрати и го снабдуваат организмот со многу B витамини, меѓу кои и B11 (фолна киселина), така што со консумација на овие лебови се зголемува нивото на серотонин, а тоа влијае на позитивното расположение.

Аеробикот е несомнено една од најпопуларните физички активности меѓу поборниците на активен живот. Овој современ начин на вежбање од своите почетоци во шеесеттите години, па досега се развил во повеќе форми.
Името аеробик е изведено од комбинацијата на зборовите air (воздух) и bios (живот). Вежбите се проследени со музичка заднина, така што се пријатни и забавни за извршување.
Тренингот позитивно влијае на менталното здравје и ве ослободува од стресот, а корисен е за сите оние коишто сакаат да ја подобрат својата здравствена состојба или да постигнат одлична физичка подготвеност.
Резултатите ќе се појават со текот на времето – важно е само да имате желба, да бидете истрајни и да водите правилен начин на исхрана.
За остварување на очекуваните резултати, потребно е да посетувате часови по аеробик 3-5 пати неделно. Придобивките ќе ги забележите по 8 недели редовно вежбање.
Активното и редовно вежбање аеробик доведува до:

– подобрување на имунолошкиот систем;
– зголемување на енергијата;
– намалување на поткожното масно ткиво;
– зајакнување на мускулите;
– здрав кардиоваскуларен систем;
– подобрување на метаболизмот;
– намалување на стресот;
– поголема флексибилност и издржливост.
Вежбајте аеробик, забавувајте се и сочувајте ги младоста и здравјето.